شوربة البطاطس

ازيكم 

وصفة النهاردة لشوربتي المفضلة شوربة البطاطس ، شوربة طريقتها سهلة جداً و خفيفة جداً و ممكن تتقدم ساخنة او دافية 

جربوها و قولولي رأيكم 

مكونات: بطاطس مكعبات

- بصلة صغيرة متقطعة -

 ورق كزبرة خضراء

- لبن (حليب كامل الدسم)

- زيت-

 ملح-فلفل-حبهان

- مرقة فراخ

الطريقة : تتشوح البصل ثم البطاطس في الزيت كويس وبعدين تتزود المرقة و تترك تغلي لحد ما تستوي البطاطس ويتزبط الفلفل والحبهان

يضاف اللبن (كامل الدسم) و تتضرب في الخلاط و ترد للنار تاني تزود الكزبرة الخضراء مقطعة ناعم قبل ما ترفع من النار مباشرة

تقدم ساخنة .. بيكون حلو معاها شرائح خبز محمص بزيت زيتون و توم 

 بالهنا و الشفا

ترتيب شنطة الخروج 101

أزيكم ،

النهارده هتكلم معاكم عن التوأم الملتصق لأي بنت و ست شنطة الخروج ، مفيش حد بيتحرك من غير شنطته و عادة بيكون فيها حاجات كتير ، شخصياً شنطتي صندوق الدنيا و ببقى ماشية بكل الحاجات اللي بستخدمها أو ممكن احتاجلها و أنا مـتاكده ان اغلب البنات زي كده. لكن اكيد بيبقى في مشكله لو الحاجات كتير انها ممكن تتوه في الشنطة خاصة لو شنطة حجمها كبير كمان وقت التغيير من شنطة لشنطة ممكن حاجات تتنسي عشان كده النهاردة هقولكم على شوية حاجات بتبعها عشان تسهل على الحياة مع الشنط .

اولاً وقت شراء الشنط بحاول قدر الأمكان اشتري شنطة متقسمة وفيها جيوب او سوست كتير لأن ده بيسهل علي الحياة في تقسييم الحاجات داخل الشنطة . لكن مش دايماً بيكون ده متاح لكن ما تقلقوش ممكن الدنيا تتنظم 

دولقت هقولكم على اهم الحاجات اللي بتكون معايا في شنطة الخروج و ازاي بتتنظم 

المحفظة.

أكيد ما ينفعش اخرج من البيت من غير المحفظة و انا بحب المحفظة يكون فيها جيوب كتير سواء للفلوس او للكروت المختلفة (بطاقة- كريدت كارد - ...) و كل ما كانت جيوب المحفظة أكتر بتقدري تنظمي بشكل أفضل لكن لو بستخدم محفظة صغيرة بستخدم معاها Card Holder لتجميع الكروت .

الشنط الصغيرة 

الشنط الصغيرة life saver بالنسبة لي حقيقي هي اكتر حاجة بتنظم الشنطة الفكرة ان الحاجات لما بتتجمع في حاجة صغيرة بتكوني عارفة مكانها بسرعة و كمان مش بتتوه وقت تغير الشنط و بستخدم منها اكتر من واحدة لكل مجوعة حاجات . 

في انواع كتير و اشكال و احجام من الشنط دي و بالاساس هي شنط ميكب لكن طبعاً تقدري تستخدميها لكل حاجة . متوفرة بشكل كبير و بأسعار مناسبة جداً 

الأشياء الأساسية : دي شنطة بتكون متوسطة الحجم بجمع فيها كل الحأجات الأساسية زي (جل اليدين- وايبس- كريم - ليب بالم - ماكياج - توك شعر - لبان ) و أي حاجة تانية ممكن تكون موجودة في شنطتي.

شنطة الطوارىء : عادة بتكون نفس النوعية بس حجمها اصغر شوية دي بتكون فيها كل مستلزمات الطوارىء (مسكن- بخاخة الأنف- بلاستر جروح - ادوات خياطة صغيرة  - و طبعاً Pad)مش قادرة اقولكم الشنطة دي قد ايه انقذت مواقف.

في نوع تاني من الشنط و هو أقرب لمقلمة عادة بيكون بلاستيك او ووتر برروف و شفاف ده متوفر  في المكتبات كلها انا اشتريت دول من سمير و علي

دي بتكون مفيدة اوي في جمع الحاجات الرفيعة زي (سماعات- كابل الموبايل - فلاش ميموري- قلم  .... الخ) 

المفاتيح : بقسمها في اكتر من ميدالية و بجمعهم في ميدالية كبيرة سهلة السحب منها ، لكن لو كفاتيحك كتير ممكن جداً تستخدمي شنطة صغيرة لهم .

الموبايل :  الموبايل عادة مش بيتوه في الشنطة غير وقت ما يرن ! و عشان شقواة الموبايل بحطة في جيب الموبايل في الشنطة ولو مش متوفر يبقى في سوستة الشنطة الداخلية عشان يبقى محكوم في مساحة صغيرة و اوصله بسهوله

دي تقريباً اهم الحاجات اللي بتساعدني في تنظيم شنطتي ، الفكرة كلها في تقسم الحاجات و استخدام الشنط الصغيرة . في النهاية انت ادرى بحاجاتك المهمة و ازاي ممكن تتقسم و اتمنى أكون اوحيتلكم و لو بفكرة لتسهيل تنظبم الشنطة

التعامل مع الهالات السوداء 101

Photo Source

أزيكم،

النهارده هتكلم معاكم عن مشكلة عويصة بتواجه ناس كتير و انا منهم و هي مشكلة الهالات السوداء. و هي ببساطة وجود لون داكن في منطقة حول العين و الجفن العلوي و عادة اللون ده بيكون نتيجة وجود الشعيرات الدموية الدقيقة اسفل الجلد الرقيق المحيط بالعين . و للتعامل مع الهالات السوداء اول حاجة لازم نعرف سبب وجود الهالات السودا و هناك اكتر من سبب او مشكلة ممكن تؤدي لوجود الهالات حول العين منها :

1. الإرهاق 
2. عدم النوم كفاية او عدم انتظام النوم.
3. الأنيميا و سوء التغذية
4. وجود مشاكل في النظر.
5. التدخين .
6. وجود مشاكل في الجيوب الأنفية (يؤدي لعدم الحصول على كمية كافية من الأكسجين ) 
7. عوامل الوراثة ( السبب الأكثر شيوعاً )

بالنسبة  لكل المشاكل السابقة اذا كانت الهالات السوداء مجرد عرض لمشكلة منهم فالحل ببساطة هو علاج المشكلة ، لكن مع ذلك المشكلة من الممكن انها تستمر و خاصة اذا كان السبب جيني و مرتبط بالطبيعة الشخصية و في الحالة دي القضاء على الهالات السودا نهائياً بيكون أمر غير ممكن (دي الحقيقة للأسف ووصلتلها بعد محاولات كتيرة ) و لكن هناك بعض العلاجات و النصائح  ممكن تخفف من مظهر الهالات السوداء و تحسين شكلها مثلاً :

شرب المياه 

 شرب المياه بكميات كافية بيخلص الجسم من المواد الضارة بالاضافة انه بيرطب الجلد ويجعل شكله صحي اكتر و اكثر مرونه وخاصة منطقة الجلد الرقيقة المحيطة بالعين.

التغذية السليمة 

 الحصول على تغذية متوازنة بيساهم في صحة مظهر الجلد و الحصول على النسب السليمة من الفيتامينات،المعادنو الاحماض الدهنية.

النوم

 النوم لساعات مناسبة ( من 7- 8) ساعات ليلاً و الانتظام في مواعيد النوم قدر الإمكان بيساعد جداً في تحسين شكل البشرة عموماً و الهالات السوداء بشكل خاص.

استخدام المواد الطبيعية 

 يوجد وصفات كتيرة لأستخدام المواد الطبيعية لتقليل مظهر الهالات السوداء اشهرها:

• شرائح الخيار 
• اكياس الشاي (الاسود او الأخضر) 
• النعناع المفروم
• الكركم و الليمون .

الحماية من الشمس 

التعرض للشمس مش من الأسباب المباشرة للهالات السوداء و لكن لأن أشعة الشمس بتسبب غمقان للون الجلد بصفة عامة فمنطقة حول العين ممكن تتأثر بأشة الشمس و يكون مظهر الهالات السوداء اسوأ و الحل هو استخدام الصن بلوك و لبس نضارة شمس لحماية منطقة العين.

 

استخدام كريم للعين .

كريمات العينين بتكون عادة كريمات مرطبة مخصصة لمنطقة الجافة و الرقيقة حول العين وظيفتها بالاساس ترطيب المنطقة دي و عادة بتكون تحتوي على مواد بتساعد في تقليل اللون  كمان كريمات العين لأنها مرطبة جداً بتخلي شكل الجلد احسن و اقوى و بتقاوم الخطوط الرفيعة المحيطة بالعين و بالتالي بتقلل من مظهر الهالات السودا . لكن لا تتوقعي انها تقضي عليها بشكل نهائي.

و دلوقت بعد ما عرفنا كل الطرق الممكنه لمقاومة الهالات السودا لكن الهالات السوداء ممكن تستمر و احياناً بتكوني محتاجة انك تغطيها و التخلص من مظهرها و ده طبعاً شيء ممكن ببساطة باستخدام الكونسيلر Eye Concelar

لكن انتبهي جداً لأن الكونسيلر ممكن يكون اختراع عبقري لو تم استخدامه بطريقة مظبوطة و ممكن يبقى نتائجه عكسية و كارثية لو تم استخدامه غلط. السر البسيط هو اختيار درجة الكونسيلر و طريقة وضعه. 

ازاي تختاري درجة الكونسيلر؟ اولاً لازم نتفق ان لون الكونسيلر ليس له علاقة بلون البشرة لكن دايماً مرتبط بلون العيب المراد تغطيته سواء بقع او هالات سودا بمعنى ان الكونسيلر لون بيستخدم لتصحيح لون اخر و بناء على قاعدة دائرة الالون (زي الصورة) القضاء على لون بيكون باللون المقابل . ايه لون الهالاات السوداء؟ اتفقنا ان لون الهالات السودا بيكون نتيجة الشعيرات الدموية المحيطة بالعين فعادة لونها بيكون بين البنفسجي الفاتح للازرق الغامق و ده ال undertone بتاعة بالاضافة للون صبغة الجلد . و واضح ان الالوان المقابلة بتكون بين درجات الاصفر و البرتقالي .لذلك لو الهالات السوداء عندك خفيفة و ظل بسيط فافضل لون كونسيلر بيكون مائل للون الأصفر و افتح درجة واحدة من لون بشرتك او نفس اللون  (بطريقة المثلث - الصورة تحت ). استخدام كونسيلر فاتح جداً زي المعتقد بيعطي نتائج كارثية و بيقلب للون رمادي و بيكون الشكل اسوأ .

دايرة ألالون  Photo Source

اما اذا كانت الهالات السوداء اغمق و اعمق فهنا لازم تستخدمي Corrector او كونسيلر مصحح لمعادلة اللون و افضل الدرجات بتكون المائلة للون البرتقالي (سيمون - او لون الخوخ ) لأنه على دايرة الألوان اللون البرتقالي مقابل للأزرق فبيساعد على اخفاء اللون. 

دي درجة اللون اللي بستخدمها و من الواضح انها غير درجة بشرتي لكن ده الون المناسب للون الهالات السوداء 

نوع الكونسيلر المستخدم Mac Studio Finish  - NW25 

الطريقة الصحيحة لوضع الكونسيلر 

في غلط شائع انا كنت بقع فيه و هو وضع الكونسيلر تحت العين فقط ، لكن الاهم هو وضعه في زاوية العين الداخلية و الطريقة المثلى هو وضع الكونسيلر في صورة مثلث زي الصورة الموضحة . و يمكن وضع الكونسيلر باستخدام فرشاة ، سفنجة او الصوابع لكن المهم عدم الحك بقوة و الافضل هو طريقة الضغط ببطىء او Patting .

Photo Source - Pinterest.com

 

دي كانت اهم النقاط من تجربتي مع الهالات السودا اتمنى تكون مفيدة و تستفيدوا منها .

 

موديلات شنط صيفية .

ازيكم،

الشنطة من الحاجات المهمة جداً في حياتنا ولا يمكن نستغنى عنها لذلك من المهم جداً تختاري الشنطة المناسبة لأنها بتأثر بشكل مباشر على شكل لبسك. لأننا في الصيف اختيارات الشنط بتكون كتيرة من حيث الموديلات و الألوان، انا عملت جولة في محلات الشنط و اخترت مجموعة موديلات عجبتني و هاعرضها لكم النهاردة عشان تختاروا منها و انتم بتشتروا المرة الجاية.

Accessorize

الشنطة دي جميلة جداً و جلدها رائع ، كروس بايد طويلة لكن واسعة وكبيرة كفاية عشان تأخد كل الاحتياجات اليومية (الكتيرة انا عارفة ) لونها محايد و ممكن يليق على الوان كتير - غير متاح الوان اخرى و سعرها 330 جنيه.

Stradivarius

شنطة باللون الأورانج عملية جداً و حجمها مناسب لها يد طويلة بجانب الايدين القصيرة و لها جيوب داخلية لتنظيم اكتر- اللون الأورانج يصلح مع كل درجات البني- الابيض و الاسود- طبعات جلد النمر.

الألوان المتاحة اصفر- كحلي- احمر-اخضر-تركواز-بني السعر 199 جنيه.

H&M 

شنطة يونيك جداً من H&M لونها بيج-روز مع اكسسوار دهبي لها سوستة كبيرة و جيوب داخليه. اللون ده رائع و يعتبر محايد و ممكن يليق على حاجات كتير - السعر 399 جنيه.

Accessorize

و لأن درجات الأخضر موجودة بقوة السنة دي طبيعي يظهر شنط باللون الأخضر - الموديل ده لطيف جداً و يشبه موديلات من ماركات كبيرة زي سيلين و فندي - الألوان المتاحة ازرق غامق و كورال - السعر 300 جنيه.

H&M

شنطة صيفي جداً باللون الدهبي و الخامة قماش يشبه القش. تصلح مع كل الملابس الكاجوال سواء نهاراً او مساء.

حجمها كبير و مناسب - السعر 199 جنيه .

Dejavu

شنطة باللون الأحمر مع studs دهبي ستايل جداً و واسعة من الداخل - الالوان المتاحة اسود - ازرق و بني السعر 189 جنيه 

5 افكار لارتداء البنطلون الملون

ازيكم ،

اتكلمنا في مرة سابقة عن الترندز في فصل الصيف للسنة دي و كان من ابرز القطع هو البنطلون الملون ، و الحقيقة البنطلون الملون مناسب جداً لفصل الصيف لأنة لا يساهم في الشعور بدرجات الحرارة المرتفعة زي البنطلونات الداكنة كمان لأنه مبهج و يصلح لكل الأوقات و يمكن ارتدائة بشكل كاجوال او سمارت كاجوال للعمل او خروجات بعد الضهر.

ازاي تلبسي و توفقى البنطلون الملون النهاردة جبت لكم شوية افكار مختلفة و كمان الاماكن اللي ممكن تحصلي منها على قطع للحصول على اللوك .

كيت ميدلتون اصبحت ايكون للموضة منذ يوم زفافها الأسطوري و فستان الزفاف البسيط و الأنيق ، و الحقيقة هي دايماً بتتبع الأسلوب البسيط في ملابسها لذلك دايماً اللوك بتاعها بيعجب ناس كتير و بيصلح ارتدائه معاهم. كيت ميدلتون ظهرت ببنطلون ملون باللون ال coral و بالمناسبة هو من الألوان المفضلة عندي و بيليق على كل الوان البشرة، ووفقت معاع بليزر باللون الكحلي 

البنطلون من Stradivarius سعره 229 جنيه 

البليزر من Zara سعره 399 جنيه.

اللوك التاني كاجوال و مريح جداً بنطلون باللون الأصفر مع قميص جينز لبني، ولأنه لوك بسيط ممكن تزودي اكسسوار زي حزام بني رفيع و Necklace ملون او دهبي . لو مش من محبي اللون الأصفر ممكن تبدلي البنطلون بأي لون تاني من اختيارك لأن القميص الجينز يليق على معظم الألوان.

البنطلون من Stradivarius سعره 229 جنيه 

القميص من روجادا سعره 179 جنيه .

درجات الأخضر الفاتح mint او aqua green حاضرة بقوة السنة دي و خاصة في البنطلون و هو لون صيفي مبهج جداً 

اللوك ده اتوفق اللون المينت مع طبعة الفهد leopard مع كوليه ملون كبير و شنطة جملي . 

البنطلون من Promod سعره 300 جنيه 

البلوزة من روجادا السعر 219 جنيه 

البنطلون الأبيض عاد بقوة السنه دي و يعتبر من الألوان الاساسية لانه ممكن يليق على الوان كتير و تم توفيقه مع توب مينت .

البنطلون من زارا سعره 399 جنيه 

التوب من برومود سعره 250 جنيه 

البنطلون المشجر من الترتدز المكتسحة السنة دي و لانه بطبيعته الوانه قوية و صريحة فالأفضل يتوفق معه قطعة سادة و بسيطة زي القميص الجينز او بلوزة بيضاء ساده 

البنطلون من Stradivarius سعره 229 جنيه

افضل بودي سبلاش من Bath&Body works

 

سلسلة باث اند بودي وركس من الاسماء المعروفة في عالم العطور، بتقدم روائح رائعة وثابتة في كل منتجاتها سواء عطور، كريمات، شموع للبيت و دايماً بتقدم روائح جديدة . من أكثر انواع البودي سبلاش المفضلة عندي باث اند بودي وركس لأنها عادة بتكون روائح مميزة ، ثابتة جداً  و قوية. 

اليوم هنقل لكم افضل انواع البودري سبلاش عن تجربتي مع Bath&Body Works 

Pink Chiffon 

رائحة ناعمة جداً و صيفية جداً النوتس الئيسية فيه هي 

 التوت،الكمثرى ، الياسمين،ازهار التفاح مع قاعدة من المسك،خشب الصندل و الأوركيد.

Japanese Cherry Blossom

النوع المفضل بالنسبة لي له رائحة مميزة و قويه جداً النوتس الرئيسية فيه من زهور الكريز،الورد،التفاح، الليلي مع قاعدة من الفانيليا،العنبر،القرفة و خشب الصندل.

Honey Sweetheart

من اجمل الروائح في البودي سبلاش منعشة و مبهجة جداً النوتس الرئيسية من   اليوسفي،الخوخ،الجريب فروت،الجاردينيا و زههر التفاح مع قاعدة من الكراميل،العنبر و المسك 

Twilight Woods 

من الروائح الجميلة و تصلح لأي وقت النوتس الرئيسية التوت ،جوز الهند، المشمش مع قاعدة خشبية من العود،المسك،الفانيليا و التوابل.

 كل مجموعة البودي سبلاش معها شاور جيل و لوشن بنفس الرائحة.

  العبوة عبارة عن زجاجة سبراي حجمها 236 مل و السعر 185 جنيه . عادة بيتعمل عرض اشتري واحدة و الثانية مجاناً ممكن تستفيدوا منه و متابعة العروض عن طريق صفحة فيسبوك الخاصة بهم https://www.facebook.com/BathAndBodyWorksMiddleEast

منتجات تجميل من المطبخ !

Photo Source

ايوه ..انت قرأت العنوان صح ادوات تجميل من المطبخ . المطبخ ملىء بكنوز توابل،خضروات و غيرها كلها اساس لصنع وصفات لذيذة لكن كمان يمكن الاستفادة من كل المواد الموجوجة في المكبخ كبدايل لمنتجات التجميل و العناية بالبشرة . و الأن لنتعرف على الوصفات السرية للتجميل داخل المطبخ.

زيت الزيتون مزيل للماكياج

استخدمي قطعة قطن مبللة بزيت الزيتون لأزالة الماكياج حتى من العيون . زيت الزيتون مزيل جيد بالاضافة لقدرته على ترطيب الجلد دون اي كيماويات.

خل التفاح لشطف الشعر .

استخدام خل التفاح يساعد على ازالة الرواسب الكيميائية للشعر و اعادة اللمعان . اخلطي 1/2 كوب خل تفاح من 1/2 كوب ماء و استخدميه لشطف الشعر بعد الغسيل بالشامبو مرة كل اسبوع.

البيكنج صودا لتهدئة الوجه

اذا كانت بشرتك حساسة تتأثر بالتعرض للشمس او السكراب يمكن علاج ذلك بخلط معلقة صغيرة من البيكنج صودا مع قطرات من المياة و تدليك الوجه بها مبلل و يشطف .

الكورن فلاور بودرة للوجه 

خلصت البودرة ؟ مفيش مشكلة استخدمي الكورن فلاور او نشا الذرة مع فرشاة البودرة لتوزيع طبقة خفيفة و ستعمل كما البودرة السائبة loose powder لامتصاص الزيوت و الحفاظ على الماكياج.

زيت الطعام لترطيب الأظافر

اذا كنتي تعاني من جفاف الاظافر و الجلد المحيط بها استخدمي زيت الطعام في تدليكها لترطيب فوري .

البن  لازالة الروائح من اليدين 

سواء من البصل و الثوم او التدخين فرك اليدين بكمية من البن يزيل الروائح تماماً 

الملح سكراب لليدين 

طريقتي المفضلة لسكراب اليدين ،ضعي طبقة من الفازلين او الكريم على اليدين دول التدليك واستخدمي كمية من الملح للتليك بصورة دائرية لمدة دقيقتين .

الليمون لتفتيح الشعر 

استخدمي عصير 2 ليمونة كبيرة مع كوب من الماء و رشيه على الشعر باستخدام بخاخة و عرضي الشعر للشمس لمدة ساعة  للحصول على خصلات فاتحة .

السكر سكراب للشفايف 

اخلطي كمية صغيرة من السكر مع Lip Balm او الفازلين و استخدميه بطريقة دائرية على الشفايف لتقشير الشفاة و التخلص من الجلد الجاف.

الشاي للقضاء على روائح القدم .

للشاي خواص مضادة للبكتريا كذلك زيت شجرة الشاي، للقضاء على روائح القدم خاصة في الصيف مع التعرق تغلى كمية من الشاي وتبرد و تنقع الاقدام لمدة 30 دقيقة.